ବଡ ଯତନରେ ସାଇତି ରଖିଲି
ତୁମ ଓକିଲର ଧମକ ଚିଠି
ସରାଗେ ଲେଖିଛ ରାଜିରେ ରାଜିରେ
ପ୍ରେମ-ବିବାହକୁ କରିବା ପିଠି ।
ପାରିବି କି ଟାଳି ତୁମ ମନକଥା
ମୋ ସୁଖର ଚାବି ତୁମରି ପାଶେ
ପ୍ରେମର ନିଶାରେ ବରଷେ ଝୁମିଲୁ
ତାପରେ ବିବାହ ହେଲାଣି ମାସେ ।
ଜାଣେ ତୁମ ପ୍ରେମ ଜାହାଜକୁ ଲୋଡା
ଗଭୀର ସାଗର ଅକାତ ଜଳ
ହେଲେ ମୁଁ ବିଫଳ ନାୟକ ତୁମର
ପାରିଲିନି ଛାଡି ଗଡିଆ କୂଳ ।
ସାତ ଜନମର ଯୁଗଳ ଜୀବନ
ଶୁଖିଲା ସପନ ଭିତର ପୋଲା
ନୁଖୁରା ପ୍ରେମର ଖୁଚୁରାରେ ଧ୍ୟାନ
କି ଲାଭ ନ ଥିଲେ ହୃଦୟ ଖୋଲା ?
ନିତି ପ୍ରତିଦିନ ମୋର ଦୋଷଗୁଣ
ଆଉ କେ କହିବ ବିଶଦେ ମୋତେ
ଝୁରି ହେଲେ ପ୍ରେମ ହୁଏ ଦୁଇଗୁଣ
କାହିଁକି କରିବି ବିଷାଦ ସତେ ?
***
Manoranjan Mishra 