ରହ ରହ କ୍ଷଣେ ଆକାଶ-ଶକଟ
ଦେଖିବି ଉପରୁ କେଉଁଠି କଟକ ।।
ଉପରୁ ଉପର ଯାଏ ଯେତେ ଦୂର
ଭସା ବାଦଲର ଅପରୂପ ପୁର
ଅପସରି ଯାଏ ତଳେ ଘର ଦ୍ୱାର,
ବାଟ ଘାଟ ନଈ ଦୋକାନ ବଜାର ।।
ଦେଖିବି ନିରେଖି ଦୂର୍ଗ ବାରବାଟି
କାଠଯୋଡ଼ି ପୋଲ, ସାହି ପରିପାଟି
ଉପରୁ ଦିଶିବ ଯୋବ୍ରା ଆନିକଟ
ହାଇକୋଟ ପୁଣି ନଦୀ ଦୁଇ ତଟ ।।
ଦିଶିବକି ସତେ ସାହି ଦେବୀଘର
ମନ୍ଦିର ମଥାନ, ଆମ ଛାତପର
ଏକାବେଳେ ମୋର ପଡିବ ନଜର
ସବୁ ଗଳିକନ୍ଦି ସାରା କଟକର ।।
ରହିଯାଆ କ୍ଷଣେ ଆକଶ ପଥରେ
ଦେଖିବି ସହର ବିହଙ୍ଗ ଆଖିରେ
ଉପରୁ ଦିଶଇ ସବୁ ସମତୁଲ
ବଡ ମନୋରମ ଡ଼ଉଲ ଡାଉଲ
ପାଖେଥିଲେ ସିନା ଦିଶେ ନରଦମା
ସାଇ ପଡିଶାର ମିଛ ପରିସୀମା
ଭୋକ, ଅନାଟନ ଭଙ୍ଗାରୁଜା ଘର
ବିଭବ, ଅଭାବ ବିରୋଧର ସ୍ୱର ।।
ରହ ରହ କ୍ଷଣେ ଆକାଶ-ଶକଟ
ଦେଖିବି ଉପରୁ କେଉଁଠି କଟକ ।।
****
Manoranjan Mishra 
କଟକ ର ଦୃଶ୍ୟ ଆକାଶ ମାର୍ଗରୁ ବହୁତ ସୁନ୍ଦର ହୋଇଛି।
କିନ୍ତୁ ମିଛ ପରିସୀମା ଦେଖାଯାଉନୀ
LikeLike