ବିନ୍ଧ ଗଣିବା ଆଗ

ପଛରେ ଚକୁଳି କରିବା ପାକୁଳି
ବିନ୍ଧ ଗଣିବା ଆଗ
କି ଲାଭ ପାଟିର ସୁଆଦ, ନଜାଣି
ରନ୍ଧା ଘରର ପାଗ !

ନାଟକରେ ଥାଉ ନବରସ ଭରି
ଶିଳ୍ପୀର କୋଟି ତପ
ଅସଲ ଆମୋଦ ଦେଇପାରେ ସିନା
ମଞ୍ଚ ପଛର ଗପ !

ମିଛ ଖବରର ପ୍ରଖର ପ୍ରସାର
କ୍ଷିପ୍ର ବିଜୁଳି ଗତି
ଅସଲ କଥାର ଅଯଥା ଓଜନ,
ସ୍ପର୍ଶ କରେନା ମତି !

ବିଫଳତା ଗପ ରୋଚକ ରସାଳ
ଉଷ୍ମ ସୃଜନ ଭରା
ସଫଳ କାହାଣୀ ମନେହୁଏ ସତେ
ଶୁଷ୍କ ନିରସ ଖରା !

ମାଗଣା ଖୋରାକି ଉଦାର ଉପୁରି
ମତ୍ତ ସୁଖର ଧାର
ଝାଳବୁହା ଧନ ହାପୁଡାଏ ଖୁସି
ତୁଚ୍ଛ ପାଣିରେ ଗାର !

ବଦଳି ଯାଉଛି ଜୀବନ ଗଣିତ
ସୂତ୍ର ନରହି ଏକା
ନୂଆ ଦୁନିଆରେ ଅଜଣା ଏଣିକି
ଶୁଦ୍ଧ ସରଳ ରେଖା ।

---